Árásirnar verði ekki til þess að „reka fleyg á milli fólks“

Gunnar Bragi Sveinsson utanríkisráðherra var meðal þeirra sem í kvöld tóku þátt í minningarathöfn um fórnarlömb skotárásanna í Kaupmannahöfn um helgina. Í tilkynningu frá utanríkisráðuneytinu kemur fram að Gunnar mun í fyrramálið eiga fund með Martin Lidegaard, utanríkisráðherra Danmerkur.

„Þetta var áhrifamikil stund,“ segir Gunnar Bragi í tilkynningunni. „Árásir helgarinnar hafa haft gríðarleg áhrif á alla hér og það snart mig hversu mikill samhugurinn var í kvöld og hversu staðráðnir allir eru í því að láta þetta ekki verða til þess að reka fleyg á milli fólks, hverrar trúar sem það er.“

Um þrjátíu þúsund manns tóku þátt í minningarathöfninni í Kaupmannahöfn í kvöld, þar á meðal ráðherrar og borgarstjórar frá öllum Norðurlöndunum.