Zlatan um Ödegaard: Þarf að rífa sig lausan frá pabba

Tveir af þekktustu knattspyrnuköppum Norðurlandanna áttust við í kvöld er Noregur og Svíþjóð gerðu markalaust jafntefli í vináttulandsleik.

Martin Ödegaard er sextán ára leikmaður Real Madrid og þótti standa sig vel í norska liðinu. Svíinn Zlatan Ibrahimovic, sem hefur átt magnaðan feril, lofaði frammistöðu kappans unga eftir leik.

„Mér fannst hann standa sig vel. Hann spilaði einfalt og tapaði ekki mörgum boltum. Hann hefur tíma til að þróa sinn leik og svalt að hann fái að spila með landsliðinu,“ sagði Zlatan í samtali við fjölmiðla eftir leikinn í kvöld.

Hann var spurður hvaða ráð hann myndi veita Ödegaard og þá barst talið að föður drengsins.

„Það er erfitt að segja. Hann á pabba sem stjórnar honum algjörlega. Hann þarf fyrst að vaxa úr grasi og verða að manni. Og að rífa sig lausan frá pabba,“ sagði Zlatan og brosti.

Svíinn var enn fremur spurður hvort hann teldi það rétt skref fyrir Ödegaard að hafa samið við stórlið Real Madrid. „Það kemur senn í ljós,“ sagði Zlatan áður en hann þakkaði fyrir sig.