Ödegaard öflugur í markalausum leik | Tyrkir unnu

Noregur og Svíþjóð skildu jöfn í vináttulandsleik í kvöld, 0-0. Augu margra beindust að hinum sextán ára Martin Ödegaard, leikmanni norska landsliðsins sem er á mála hjá Real Madrid.

Ödegaard þótti spila vel í leiknum og var iðinn við að skapa marktækifæri fyrir félaga sína. Alexander Söderlund, fyrrum leikmaður FH, var í fremstu víglínu norska liðsins en náði ekki að skora í fyrri hálfleik þrátt fyrir nokkur góð færi.

Þá fékk Pal Helland gott færi í síðari hálfleik eftir undirbúning Ödegaard en allt kom fyrir ekki.

Meðal annarra úrslita má nefna að Danmörk vann Svartfjallaland, 2-1. Viktor Fischer tryggði Dönum sigurinn með marki úr vítaspyrnu á 86. mínútu. Stevan Jovetic kom Svartfellingum yfir í leiknum en Christian Eriksen jafnaði.

Þá hafði Tyrkland betur gegn Búlgaríu, 4-0. Hakan Calhanoglu og Buruk Yilmaz skoruðu tvö mörk hvor fyrir Tyrki, sem leika í riðli Íslands í undankeppni EM 2016.