Interpol gefur út handtökuskipun á hendur Íslendingi

Interpol hefur gefið út handtökuskipun á hendur Alferð Clausen. Alfreð er grunaður um að hafa tekið þátt í að svíkja 44 milljónir dollara, um 6,1 milljarða króna, út úr viðskiptum lögfræðistofu sem leituðust eftir því að endursemja um lánagreiðslur sínar. Greint var frá handtökuskipuninni á vef RÚV.

Lögreglan í San Bernardino hefur leitað Alfreðs síðan í mars en hann hefur enn ekki gefið sig fram. Lögmaður Alfreðs á Íslandi, Vilhjálmur Hans Vilhjálmsson, sendi frá sér yfirlýsingu fyrir hönd skjólstæðings síns í kjölfar þess að málið komst í hámæli í mars. Þar kemur fram að Alfreð hafi dvalið hér á landi að undanförnu og að ásakanirnar eigi ekki við rök að styðjast.

Vilhjálmur greinir frá að Alfreð Örn hafi lýst sig viljugan að ræða við íslensk lögregluyfirvöld sem og bandarísk hér á landi en til Bandaríkjanna ætli hann ekki því þá þurfi hann að sitja í fangelsi þangað til málið er tekið fyrir. Það gæti tekið 2-3 ár.

Þetta er ekki í fyrsta skipti sem Alfreð er grunaður um fjársvikastarfssemi en árið 1993, þegar Alfreð hét Alfreð Hermansson, var hann grunaður um að hafa falsað greiðslunótur fyrir kaupum á hálsbindum.