Óvænt og ósanngjarnt að Messi var fyrir ofan Neuer

Toni Kroos, leikmaður Real Madrid og þýska landsliðsins í fótbolta, finnst að samlandi sinn Manuel Neuer hefði átt að hafna í öðru sæti í kjörinu yfir besta leikmann heims.

Neuer varð í þriðja sæti á eftir Lionel Messi og Cristiano Ronaldo, en Portúgalinn var kjörinn sá besti í heimi annað árið í röð með tæplega fjórðung atkvæða.

Messi fékk 15,76 prósent atkvæða og var rétt á undan Bayern-markverðinum í kosningunni, en Neuer fékk 15,72 prósent atkvæða í kosningu landsliðsfyrirliða, landsliðsþjálfara og blaðamanna.

„Það kemur á óvart og er svolítið ósanngjarnt að Neuer hafi verið fyrir neðan Messi,“ sagði Kroos, sem spilaði með Neuer hjá Bayern, í viðtali við Sky Sports í gærkvöldi.

„Ég hélt þetta yrði mjög jöfn barátta milli Manuel og Cristiano. Neuer var langbesti markvörður heims og Cristiano besti útispilarinn. Þetta átti að vera á milli þeirra í raun og veru,“ sagði Toni Kroos.

Kroos var einn fjögurra Þjóðverja sem komust á topp tíu í kosningunni um Gullboltann, en hann fékk 1,43 prósent atkvæða. Thomas Müller og Phillip Lahm voru einnig á meðal tíu efstu.