Óvissa um framtíð Dzeko hjá Manchester City

Manuel Pellegrini, knattspyrnustjóri Manchester City, staðfesti í dag að ástæðan fyrir því að Edin Dzeko hefur ekki leikið mínútu með félaginu í fyrstu tveimur æfingarleikjunum er vegna óvissunar sem ríkir um framtíð hans hjá félaginu.

Manchester City hefur leikið tvo æfingarleiki gegn Melbourne City og Roma í æfingarferð sinni um Ástralíu og haft betur í þeim báðum. Þrátt fyrir að hvorki Sergio Agüero né Wilfried Bony hafi ferðast með liðinu í ferðina hafa hvorki Stevan Jovetic né Edin Dzeko leikið eina einustu mínútu.

Dzeko hefur verið orðaður við Roma undanfarnar vikur en honum hefur aldrei tekist að festa sig í sessi í byrjunarliði Manchester City. Var hann aðeins 11 sinnum í byrjunarliði Manchester City á nýafstöðnu tímabili og skoraði hann fjögur mörk.

„Edin fékk engar mínútur í síðasta leik og það er ástæða fyrir því, það er ekki víst hvort hann sé á förum frá félaginu eða ekki. Hann mun halda áfram að æfa með liðsfélögum sínum og svo sjáum við hvað setur,“ sagði Pellegrini.

Manchester City leikur þriðja leik sinn á undirbúningstímabilinu á morgun er liðið tekur á móti Real Madrid í Melbourne.