Kantmaður frá Barcelona til Stoke

Stoke hefur klófest enn einn fyrrum leikmann Barcelona en félagið hefur gengið frá samningum við hinn nítján ára Moha El Ouriachi.

El Ouriachi er kantmaður sem hafnaði nýjum samningi við Barcelona. Hjá Stoke hittir hann fyrir tvo aðra fyrrum leikmenn Barcelona, þá Marc Muniesa og Bojan Krkic.

Hann hefur bæði spilað fyrir yngri landsið Spánar og Marokkó en kaupverð hans er óuppgefið sem og lengd samnings hans við félagið.

„Hann hefur séð hvernig Bojan og Marc hafa náð að bæta sig hjá Stoke og vill gera það sama,“ sagði Tony Scholes, framkvæmdastóri Stoke, við enska fjölmiðla.

Stoke endaði í níunda sæti ensku úrvalsdeildarinnar í vor og hefur nú fengið sjö leikmenn til liðs við félagið í sumar. Hinir eru Shay Given, Joselu, Jakob Haugaard, Glen Johnson, Philipp Wollscheid og Marco van Ginkel.