Nýliðarnir halda áfram að sanka að sér leikmönnum

Nýliðar Watford í ensku úrvalsdeildinni halda áfram að bæta við sig leikmönnum en nú síðast gerðu þeir fjögurra ára samning við hægri bakvörðinn Allan Nyom.

Nyom var í eigu Udinese frá 2009 til 2015. Hann lék hins vegar aldrei með ítalska liðinu heldur var hann öll árin lánaður til Granada á Spáni. Bæði lið eru í eigu Pozzo-fjölskyldunnar líkt og Watford.

Nyom hefur leikið 11 landsleiki fyrir Kamerún, þar af alla þrjá leiki liðsins á HM í Brasilíu í fyrra.

Nyom er sjöundi leikmaðurinn sem Watford fær í sumar á eftir markverðinum Giedrius Arlauskis, varnarmönnunum Sebastian Prodl og Jose Holebas, miðjumönnunum Etienne Capoue og Valon Behrami og framherjanum Matej Vydra.

Þá er kominn nýr maður í þjálfarastólinn hjá Watford; Spánverjinn Quique Flores sem tók við af Slavisa Jokanovic.