James Milner tryggði Liverpool sigur

Liverpool-liðið hefur unnuð tvo fyrstu leiki sína í æfingaferð félagsins til suðaustur Asíu og Ástralíu.

Liverpool vann í dag 2-1 sigur á ástralska úrvalsdeildarliðinu Brisbane Roar en leikið var á heimavelli ástralska félagins á Suncorp-vellinum í Brisbane á austurströnd Ástralíu.

Það var einn af nýju leikmönnum Liverpool-liðsins, James Milner, sem skoraði sigurmarkið á 75. mínútu leiksins en hann lagði einnig upp fyrra mark liðsins.  

James Milner skoraði marki sitt á laglegan hátt eftir að hafa fengið sendingu frá fyrirliðanum Jordan Henderson áður en hann klobbaði varnarmann og lyfti boltanum síðan yfir markvörðinn.

Brisbane Roar komst yfir strax á 17. mínútu með marki Dimitri Petratos en Adam Lallana jafnaði fyrir Liverpool ellefu mínútum síðar.

Adam Lallana skoraði einnig í 4-0 sigri á tælenska úrvalsliðinu á þriðjudaginn en að þessu sinni skoraði hann eftir að hafa fengið stoðsendingu frá James Milner.

Næsti leikur Liverpool er á móti Adelaide United á mánudaginn en liðið spilar einnig við úrvalslið frá Malasíu í þessari ferð áður en liðið snýr aftur til Evrópu.