Mögnuð endurkoma Ragnars og félaga

Ragnar Sigurðsson og félagar í Krasnodar unnu góðan endurkomusigur á Kuban' Krasnodar, 2-3, í rússnesku úrvalsdeildinni í fótbolta í dag.

Krasnodar var ekki í góðum málum lengi vel en efir 67 mínútna leik var staðan 2-0, heimamönnum í vil. En þá tóku gestirnir við sér og þeir tryggðu sér sigurinn með þremur mörkum á 16 mínútna kafla.

Wanderson kom Krasnodar á bragðið á 71. mínútu og níu mínútum síðar jafnaði Pavel Mamaev metin úr vítaspyrnu. Það var svo Fyodor Smolov sem tryggði Krasnodar sigurinn með marki þremur mínútum fyrir leikslok.

Ragnar var í byrjunarliði Krasnodar og lék allan leikinn en hann hefur komið við sögu í 13 af 18 deildarleikjum liðsins á tímabilinu.

Með sigrinum, sem var sá fjórði í síðustu fimm leikjum, komst Krasnodar upp í 5. sæti deildarinnar.