Messi bestur í heimi að mati Guardian | Þrír af fjórum efstu leika með Barcelona

Líkt og síðustu ár hafa sérfræðingar the Guardian valið 100 bestu fótboltamenn í heimi en listinn var birtur í heild sinni í dag.

Lionel Messi er besti leikmaður heims árið 2015 að mati Guardian en argentínski snillingurinn hirðir toppsætið af Cristiano Ronaldo sem var bestur í fyrra. 74% þeirra 123 sérfræðinga sem sáu um að velja listann settu Messi í efsta sætið.

Samherjar Messi hjá Barcelona, Neymar og Luís Suárez, eru í 3. og 4. sæti en þetta magnaða sóknartríó hefur skorað samtals 134 mörk á árinu sem nú er senn á enda.

Robert Lewandowski er einn af hástökkvurum listans en Pólverjinn fer úr 30. sæti upp í það fimmta. Bayern München á tvo aðra leikmenn í tíu efstu sætum listans; Thomas Müller (6.) og Manuel Neuer (8.).

Meðal nýrra nafna sem koma inn á listann má nefna Kevin De Bruyne sem er í 14. sæti og Leicester-bræðurna Jamie Vardy (68.) og Riyad Mahrez (99.).

Spánn á flesta leikmenn á listanum (16) en Bayern er það félagslið sem á flesta fulltrúa á listanum, eða 12 talsins.

England á aðeins fjóra leikmenn á listanum; Harry Kane (38.), Wayne Rooney (60.), Raheem Sterling (62.) og Vardy (68.).

Tíu bestu leikmenn heims að mati Guardian (listann í heild sinni má sjá með því að smella hér:

1. Lionel Messi (Barcelona og Argentína)

2. Cristiano Ronaldo (Real Madrid og Portúgal)

3. Neymar (Barcelona og Brasilía)

4. Luís Suárez (Barcelona og Úrugvæ)

5. Robert Lewandowski (Bayern München og Pólland)

6. Thomas Müller (Bayern og Þýskaland)

7. Zlatan Ibrahimovic (PSG og Svíþjóð)

8. Manuel Neuer (Bayern og Þýskaland)

9. Sergio Agüero (Man City og Argentína)

10. Alexis Sánchez (Arsenal og Chile)