Innlent

Ránið í Borgartúni upplýst að miklu leyti

Þorbjörn Þórðarson skrifar
Bankaránið í útibúi Landsbankans Borgartúni í gær er upplýst að miklu leyti en báðir ræningjanna eru í haldi lögreglunnar og hefur annar þeirra játað. Farið verður fram á gæsluvarðhald yfir þeim síðar í dag.

Aðgerðir lögreglu við leit að ræningjunum í gær voru mjög umfangsmiklar en lögreglan naut liðsinnis þyrlu Landhelgisgæslunnar við leit í Öskjuhlíð og nærumhverfi. Flóttabíll sem mennirnir studdust við í ráninu, stolinn Ford Transit, fannst yfirgefinn í Barmahlíð og til mannanna sást við bensínstöð í Hlíðunum. Um klukkan sjö var leit í Öskjuhlíð hætt. Um svipað leyti réðst lögreglan til atlögu í íbúð í blokk í Stigahlíð. Í íbúðinni voru tveir handteknir skömmu fyrir sjö í gærkvöldi og sá þriðji var síðan leiddur út í járnum rétt fyrir átta. Hann var í íbúðinni með sérsveitarmönnum í rúmlega einn og hálfan klukkutíma áður en hann var færður niður á stöð í yfirheyrslu.

Nú liggur fyrir að engin tengsl eru á milli mannanna sem handteknir voru í Stigahlíð og ræningjanna tveggja. Friðrik Smári Björgvinsson yfirlögregluþjónn stýrir rannsókn málsins.

„Eftir að lögreglan sendir frá sér myndir í gærkvöldi og fjölmiðlar birtu þær þá gaf sig fram maður um tvítugt og játaði aðild að ráninu. Í kjölfarið var annar maður á svipuðum aldri handtekinn og þeir eru báðir í vörslu lögreglu og yfirheyrslur standa yfir,“ segir Friðrik Smári. Hann segir líklegt að farið verði fram á gæsluvarðhald yfir mönnunum síðar í dag.

„Málið er upplýst að hluta, að minnsta kosti og á þessari stundu eru ekki fleiri grunaðir. Rannsókn miðar mjög vel og eftir að lögreglan leitaði til almennings með myndbirtingum og annað slíkt fengum við fjölmargar ábendingar sem við fylgdum eftir og það endaði svo með þessum handtökum í nótt.“ Friðrik Smári segir að ábendingar frá almenningi, m.a. gegnum Facebook, hafi skipt sköpum.

Mynd af ræningjunum úr eftirlitsmyndavél bankans. Skotvopnið reyndist eftirlíking.
Lögreglan hefur endurheimt hluta þess fjár sem var rænt. Ekki hefur verið gefið upp hversu há fjárhæðin er en samkvæmt upplýsingum frá Landsbankanum var um að ræða „óverulega fjárhæð.“ Skotvopn sem notað var í ráninu er fundið og reyndist það eftirlíking.

„Þegar ránið er framið þá er það gert með mjög afgerandi hætti. Það er ógnað með vopnum, annars vegar hnífi og hins vegar skotvopni. Á þeirri stundu var ekki annað vitað en að um raunverulegt skotvopn væri að ræða. Við leit lögreglu fannst skotvopn sem reyndist vera eftirlíking að skammbyssu,“ segir Friðrik Smári.

Sakborningarnir í málinu gætu átt yfir höfði sér þunga fangelsisdóma. Fyrir rán samkvæmt almennum hegningarlögum er hægt að dæma allt að tíu ára fangelsi en hafi mjög mikil hætta verið samfara ráninu, getur refsingin þó orðið allt að 16 ára fangelsi.

 


Tengdar fréttir

Vitni lýsir ráninu í Landsbankanum

Bankaræningjarnir ógnuðu starfsfólki og viðskiptavinum bankans með vopnum. Inni í bankanum voru meðal annars börn.




Fleiri fréttir

Sjá meira


×