Tyrkneska sambandið þarf að greiða samkynhneigðum dómara bætur

Tyrkneskur dómstóll hefur dæmt knattspyrnusamband landsins til að greiða knattspyrnudómarabætur vegna ólögmætrar uppsagnar.

Knattspyrnudómaranum Halil Ibrahim Dincdag var sagt upp störfum af sambandinu af þeirri ástæðu einni að hann var samkynhneigður.

Tyrkneska sambandið þarf að greiða 23 þúsund tyrkneska lírur eða um eina milljón íslenskra króna í málskostnað og skaðabætur til Halil Ibrahim Dincdag. Guardian tók fréttina upp frá Dogan-fréttastofunni.

Tyrkneska sambandið rökstuddi ákvörðun sína með því að sambandið væri í fullum rétti þar sem tyrkneski herinn hafði einnig dæmt hann óhæfan vegna kynhneigðar sinnar. Dómarinn var ekki sammála því og dæmdi Dincdag í hag.

Halil Ibrahim Dincdag missti dómararéttindin sín árið 2009 eftir að hann kom út úr skápnum, Lögmaður Dincdag sóttist eftir fimm milljónum í skaðabætur en fékk aðeins tuttugu prósent af þeirri upphæð.

Fyrir þá sem kunna tyrknesku þá er hægt að lesa viðtal við Halil Ibrahim Dincdag hér. Dincdag segir þar frá raunum sínum, veikindum móður sinnar og þeirri staðreynd að tvö hundruð atvinnuumsóknir hans hafa ekki borið árangur.