Endurtekur Stoke leikinn frá 1972?

Stoke City komst í gær í undanúrslit enska deildarbikarsins eftir 2-0 sigur á B-deildarliði Sheffield Wednesday á heimavelli sínum, Brittania Stadium.

Ibrahim Affelay kom Stoke yfir eftir hálftíma leik með sínu fyrsta marki fyrir félagið og Phil Bardsley gulltryggði svo sigurinn þegar hann kom Stoke í 2-0 á 75. mínútu.

Þetta er í fyrsta sinn í 43 ár sem Stoke kemst í undanúrslit deildarbikarsins, eða frá árinu 1972. Stoke-menn gerðu gott betur það ár og unnu deildarbikarinn en það er líklega stærsti titilinn sem félagið hefur unnið í 152 ára langri sögu þess.

Stoke sló West Ham út í undanúrslitunum 1972 og mætti Chelsea í úrslitaleiknum á Wembley.

Meðal þekktra leikmanna í herbúðum Stoke á þessum tíma má nefna Jimmy Greenhoff, Gordon Banks og George Eastham, en þeir tveir síðastnefndu voru hluti af enska landsliðinu sem varð heimsmeistari á heimavelli 1966.

Eastham var hetja Stoke í úrslitaleiknum fyrir 43 árum en hann skoraði sigurmark liðsins á 73. mínútu. Terry Conroy kom Stoke yfir strax á 5. mínútu en Peter Osgood jafnaði metin fyrir Chelsea á lokamínútu fyrri hálfleiks.

Mark Hughes, knattspyrnustjóri Stoke, telur að liðið geti endurtekið leikinn frá 1972.

„Við eigum möguleika gegn hvaða liði sem er í tveggja leikja einvígi,“ sagði Hughes eftir sigurinn á Sheffield Wednesday.

Manchester City og Everton komust einnig áfram í gær og í kvöld kemur svo í ljós hvort það verður Liverpool eða Southampton sem tryggir sér síðasta lausa sætið í undanúrslitum deildarbikarsins.