Vissu að þeir væru að gera árás á sjúkrahús

Hernaðaryfirvöld í Bandaríkjunum vissu af sjúkrahúsi Lækna án landamæra í Kunduz í Afganistan, áður en loftárás var gerðar á sjúkrahúsið. Talið var að Talibanar væru að nota sjúkrahúsið sem birgðageymslu og stjórnstöð. Samkvæmt AP fréttaveitunni er þó ekki ljóst hvort að foringjar á svæðinu hafi vitað að um sjúkrahús væri að ræða.

Minnst 22 sjúklingar og starfsmenn létu lífið í árásinni.

Viðmælandi AP segir að greinendur hersins sem hafi fylgst með orrustunni um Kunduz og aflað upplýsinga fyrir þá sem börðust, hafi einnig talið að fjöldi vopna hefðu verið geymd í sjúkrahúsinu.

Yfirmaður herafla Bandaríkjanna í Afganistan, John Campbell, hefur sagt að loftárásin hafi verið mistök. Hins vegar hefur hann ekki sagt hver gaf skipunina um árásina, né hvers vegna hún hafi verið gerð. Í fyrstu sögðu hernaðaryfirvöld að Talibanar hefðu skotið á hermenn frá sjúkrahúsinu, en það hefur verið dregið til baka.

Skotið fimm sinnum á sjúkrahúsið

Læknar án landamæra þvertaka fyrir að vígamenn Talibana hafi haldið til í sjúkrahúsinu og að vopn hafi verið geymd þar. Þeir segja að flugvélin sem gerði árásina hafi skotið fimm sinnum á sjúkrahúsið á rúmri klukkustund.

Yfirvöld í Bandaríkjunum og í Afganistan hafa sett af stað rannsóknir á því hvernig atvikið átti sér stað og Barack Obama, forseti Bandaríkjanna hefur beðist afsökunar. LÁL kalla þó eftir alþjóðlegri rannsókn á árásinni.

Samtökin segja að þeir hafi hlúð að vígamönnum Talibana, en vopn hafi ekki verið leyfð á lóð sjúkrahússins. Þá hafa starfsmenn sjúkrahússins sem AP hefur rætt við sagt að engin skothríð frá sjúkrahúsinu hafi átt sér stað.