Landsliðssætið út um gluggann

Guðlaugur Victor Pálsson gengst í dag undir aðgerð vegna alvarlegra meiðsla í vöðva aftan í læri en talið er að hann verði frá keppni næstu níu mánuðina. „Gríðarlegt áfall,“ segir Guðlaugur sem leikur með Esbjerg í Danmörku.

„Tímabilið er bara búið,“ sagði Guðlaugur í samtali við Fréttablaðið í gær. Það er algengt að íþróttamenn, ekki síst knattspyrnumenn, togni í vöðva aftan í læri (e. hamstring), en Guðlaugur varð fyrir því óláni að vöðvinn rifnaði. „Ég hef rætt við marga lækna og sjúkraþjálfara. Þetta eru afar óalgeng meiðsli,“ segir Guðlaugur sem meiddist eftir að hafa lent í samstuði við markvörð Lyngby í bikarleik.

Guðlaugur fékk sendingu inn í teig og var að teygja sig í boltann með löppinni þegar hann fékk markvörðinn á sig, meðþeim afleiðingum að það ofteygðist á vöðvanum og hann rifnaði.

„Þetta er eins óheppilegt og það gerist. Markvörðurinn ætlaði að kýla boltann í burtu en lendir á mér með þessum afleiðingum,“ segir Guðlaugur Victor sem hafði skorað og verið valinn maður leiksins í sínum fyrsta leik með Esbjerg aðeins tíu dögum áður.

„Í fyrstu var talað um slæma tognun og að ég yrði frá í 4-6 vikur,“ segir Guðlaugur sem meiddist fyrir tæpum fjórum vikum . „En svo kom í ljós að greining læknanna var röng. Ég fór í aðra myndatöku og þá kom rifan í ljós,“ segir Guðlaugur sem hafði háleit markmið fyrir tímabilið.

„Ég var keyptur fyrir háa upphæð og því góð pressa á mér. Svo má ekki gleyma að ég fór frá Helsingborg (í Svíþjóð) til að komast aftur í mína stöðu og vinna mig nær landsliðinu. En það er núna farið út um gluggann,“ segir Guðlaugur sem á fjóra A-landsleiki að baki.

Hann segir að stuðningur allra hjá Esbjerg hafi verið góður og að það komi ekkert annað til greina fyrir hann en að koma enn sterkari til baka en hann var áður. Glíma Guðlaugs við andleg veikindi hefur verið til umfjöllunar síðastliðin ár og hann segir að sú reynsla hjálpi sér nú.

„Ég hef verið að vinna í sjálfum mér í dágóðan tíma og þó svo að þetta sé slæmt er þetta ekki það versta sem hefur komið fyrir mig. Ég hef unnið mig úr verri aðstæðum og get unnið mig til baka úr þessu.“