Martínez: Howard á nóg eftir

Roberto Martínez, knattspyrnustjóri Everton, segir að markvörðurinn Tim Howard eigi nóg eftir og muni spila áfram með Bítlaborgarliðinu næstu árin.

Howard, sem er 36 ára, hélt marki sínu hreinu í markalausu jafntefli Everton og Swansea um helgina en hann hefur aðeins fengið á sig fimm mörk í fyrstu sex umferðunum í ensku úrvalsdeildinni á tímabilinu.

Þetta var í 112. skipti sem Howard heldur hreinu í deildarleik í búningi Everton en aðeins tveir markverðir hafa haldið oftar hreinu í deildarleikjum í sögu félagsins.

Gordon West hélt marki Everton 124 sinnum hreinu á árunum 1962-73 en metið á Neville Southall sem lék 197 leiki án þess að fá á sig mark á árunum 1981-1998.

„Það er mikið afrek að halda markinu hreinu 112 sinnum. Félagið hefur verið heppið með markverði í gegnum tíðina,“ sagði Martínez um Howard sem ætlar að hætta eftir HM 2018 þegar samningur hans við Everton rennur út.

„Þetta er stór áfangi en Tim á nóg mikið og á eftir að spila í mörg ár til viðbótar,“ bætti Spánverjinn við.

Þessir markverðir hafa haldið oftast hreinu í deildarleikjum með Everton:

1. Neville Southall - 197 sinnum (578 leikir)

2. Gordon West - 124 (335 leikir)

3. Tim Howard - 112 (335 leikir)

4. Ted Sagar 112 (463 leikir)

5. Billy Scott - 76 (251 leikir)