Segir mál Sóleyjar lýsandi dæmi um stöðuna í borginni

Borgarfulltrúi Sjálfstæðisflokksins segir að mál sextán ára fjölfatlaðrar stúlku, sem hefur ekki fengið dagvistunarúrræði í Reykjavík síðan hún flutti þangað úr öðru sveitarfélagi fyrir þremur vikum, sé gott dæmi um að velferðarkerfið í Reykjavík brjóti á fötluðum einstaklingum. Fjölskyldur fatlaðra barna rekist oft á veggi hjá borginni. 

Í fréttum okkar í gær sögðum við frá því að Sóley, fjölfötluð sextán ára gömul stúlka sem í byrjun mánaðarins flutti til Reykjavíkur úr Reykjanesbæ, fengi hvorki dagvistun né skólavist í Reykjavík. Foreldrar Sóleyjar gerðu ekki ráð fyrir að hún fengi inn í skóla í sveitarfélaginu þar sem skólaárið er hafið, en gengu þó út frá því að hún fengi dagvistun eins og lög gera ráð fyrir að sveitarfélög útvegi fötluðum einstaklingum.

Þeim brá því þegar þau fengu svör um að í Reykjavík væri ekki dagvistunarúrræði í boði fyrir sextán til tuttugu ára einstaklinga. Almennt sé gert er ráð fyrir að því að þeir séu í skóla og fari svo í frístundaúrræði á vegum Hins hússins. Sóleyju hefur verið boðið að vera part úr degi í Hinu húsinu til áramóta, en þangað getur hún þó ekki farið fyrr en búið verður að ráða inn starfsmann, sem er óvíst er hvenær verður.

Fjölskylda Sóleyjar hefur því skipt því með sér að vera heima með henni. Auk þess sem starfsfólk Rjóðursins, sem er hvíldar og endurhæfingarheimili fyrir langveik börn og  rekin af Landspítalanum, hefur hlaupið undir bagga og tekið á móti Sóleyju í dagvistanir en það er að sögn foreldra hennar algjört neyðarúrræði.  

Stefán Eiríksson, sviðsstjóri velferðarsviðs Reykjavíkurborgar, vildi ekki veita fréttastofu viðtal vegna málsins þegar eftir því var leitað í dag. Hann vísar því þó á bug að Reykjavíkurborg hafi ekkert aðhafst í málinu. Verið sé að vinna að leiðum og lausnum sem í sumum tilfellum sé flókið úrlausnar og taki tíma. Þá séu oft biðlistar eftir slíkri þjónustu í sveitarfélögum.

Áslaug Friðriksdóttir, borgarfulltrúi Sjálfstæðisflokksins, sagði í föstudagsviðtalinu fyrir helgi að fjölskyldur fatlaðra barna rekist oft á tíðum á veggi hjá borginni. Hún segir að velferðarkerfið brjóti oft á tíðum á fólki. Reynsla Sóleyjar og fjölskyldu sé ekki einsdæmi.

„Ég er hrædd um að þetta sé bara eitt af mörgum dæmum í Reykjavík þar sem verið er að brjóta á fólki. Þjónustan er ekki veitt á forsemdum notenda. Við erum ennþá föst í kerfislægri þjónustu þar sem fólk rekst bara á veggi,“ segir Áslaug.

Þjónustan þurfi að vera einstaklingsmiðaðri, en til að fjármagn fáist til þess þurfi að forgangsraða upp á nýtt í borginni.

„Mér finnst bara engin spurning um að forgangsraða algjörlega með þennan hóp í huga. Þá sem þurfa þessa grunnþjónustu heim bara til að lifa eðlilegu lífi. En til þess þarf mjög harða fjármálastjórnun og ég er ekki alveg að sjá það gerast í dag,“ segir Áslaug Friðriksdóttir borgarfulltrúi.