"Þetta var það eina í stöðunni“

Tvær íslenskar barnafjölskyldur fluttu til Danmerkur í sumar vegna skorts á þjónustu við heyrnarlaus börn. Annar fjölskyldufaðirinn segir að yfirvöld bregðist of hægt við og að annað hafi ekki verið í stöðunni.

Stöð 2 hefur undanfarið greint frá því að á íslensk heyrnalaus börn fái ekki námsefni á sínu móðurmáli, táknmáli, vegna þess að það er ekki framleitt hér á landi vegna fjárskorts. Fjölskylda Andra Fannars Ágústssonar er á leið í sitt annað mál við íslenska ríkið, en þau telja brotið á mannréttindum heyrnalausra barna með þessum hætti.

Tvær sex manna íslenskar fjölskyldur fluttu í lok sumars til smábæjarins Fredericia í Danmörku vegna lélegrar þjónustu við heyrnalaus börn á Íslandi. Annar drengurinn sem um ræðir heitir Viktor Karl Kristjánsson og er átta ára, en hann fæddist heyrnalaus. Foreldrar Viktors telja hann ekki hafa fengið þá þjónustu sem hann þurfti hér og sáu þann kost vænlegastan að flytja af landi brott með hann og þrjú yngri systkini. Auk þess sem námsefni vantaði fékk hann ekki félagslegan stuðning á Íslandi. Aðra sögu er að segja í Danmörku.

„Að það þurfi að vera að berjast fyrir því að fá túlkasjóð, þurfa að berjast fyrir því að fá námsefni er ömurlegt. Við ákváðum að fara því bara eitthvert þar sem þetta er í lagi. Tíminn flýgur áfram og þó að þetta verði komið þegar hann er orðinn tíu, ellefu ára þá er hann búinn að missa af svo miklu. Þess vegna finnst okkur bara tvö, þrjú ár í einhverja baráttu sem maður veit ekkert hvort að skilar sér vera of langur tími,“ segir Kristján faðir Viktors Karls. Hann segir fleiri fjölskyldur heyrnarlausra barna á leið úr landi.

„Foreldrar þeirra eru allir að skoða að flytja. Þeir sem eiga krakka hafa verið að fara til Danmerkur og Noregs að skoða aðstæður.“

Það sé ekki draumastaða að flytja til útlanda og yfirgefa fjölskyldu og vini á Íslandi.

„Okkur langaði ekkert að fara út þannig. Við erum með þrjú önnur börn og ég á tvö heima fyrir. Þetta er ekki draumastaðan en við metum það þannig að þetta sé það eina í stöðunni,“ segir Kristján.