Túlkasjóðurinn uppurinn: „Fjármunirnir eru takmarkaðir“

Menntamálaráðherra gerir ekki ráð fyrir að meiri fjármunir verði settir í túlkasjóð heyrnalausra á þessu ári, en sjóðurinn, sem átti að tryggja heyrnalausum túlkaþjónustu úr árið, kláraðist fyrr í mánuðinum.

Við greindum frá því í fréttum okkar fyrir skömmu að heyrnalausir lýstu yfir þungum áhyggjum vegna málsins, en þetta er annað árið í röð sem sjóðurinn tæmist á miðju ári.  Túlkunum er ætlað að aðstoða heyrnarlausa einstaklinga í daglegu lífi og telur formaður félags heyrnarlausra  ríkið brjóta lög með því að veita ekki þessa þjónustu nema hluta úr ári.

„Það er í raun búið að útiloka okkur frá þátttöku í þjóðfélaginu. Það er búið að útiloka okkur frá því að sinna okkar skyldum sem húseigendur, sem foreldrar, bara sem virkur þjóðfélagsþegn.“

Fjármagn til sjóðsins var aukið um sex milljónir í ár, eða þá upphæð sem þótti vanta upp á í fyrra. Aftur á móti hafa túlkagjöld hækkað nokkuð á þessu ári og því hægt að fá umtalsvert minni þjónustu fyrir peningana. Menntamálaráðherra segir á ábyrgð Samskiptamiðstöðvar heyrnarlausra og heyrnarskertra að forgangsraða úthlutunum úr sjóðnum.

„Í þessari þjónustu eins og í annarri þjónustu sem er verið að veita, þarf auðvitað að forgangsraða og tryggja að þeir fjármunir sem eru til skiptanna dugi fyrir árið. Þetta á við um allt annað, hvort sem um er að ræða spítalana eða þjónustu við langveik börn og svo framvegis. Þannig að við tókum ákvörðun um það í fyrra að bæta við einum sex milljónum og á þessu ári. Þá verðum við að reyna að láta það duga,“ segir Illugi Gunnarsson, menntamálaráðherra.

Illugi segir að til standi að endurskoða málaflokkinn í heild sinni, bæði í mennta, heilbrigðis og velferðarráðuneytinu.

„Fjármunirnir eru takmarkaðir þannig að það er hægt að taka fram endalaus dæmi um það sem við vildum gjarnan bæta í og við höfum svo sannarlega bætt við í þennan málaflokk. Við gerðum það í fyrra og á þessu ári líka,“ segir Illugi.