Umfjöllun, viðtöl og einkunnir: ÍBV - Fylkir 0-1 | Hermann sótti þrjú stig á gamla heimavöllinn

Fylkismenn sóttu þrjú stig til Eyja í Pepsi-deild karla í kvöld með 1-0 sigri. Leikurinn vannst á markmannsmistökum Guðjóns Orra Sigurjónssonar en hann missti boltann inn, í marki Fylkismanna.

Hermann Hreiðarsson var að heimsækja sinn gamla heimavöll en Ásmundur Arnarsson að fá sína gömlu lærisveina í heimsókn. Leikurinn var því ekki einungis mikilvægur í stigabaráttunni í Pepsi-deildinni.

Bæði lið höfðu unni stórsigra á hvort öðru fyrr í sumar en Fylkismenn sigruðu deildarleikinn 3-0. Eyjamenn höfðu betur í bikarnum en þar skoruðu þeir fjögur mörk gegn engu. Í dag var leikurinn mun jafnari en hvorugt liðið ætlaði að gefa stigið frá sér.

Það var fátt um fína drætti í fyrri hálfleik en hvorugt liðið ætlaði að leggja upp með flottum fótbolta. Langar sendingar upp völlinn voru einkennandi fyrir leikinn en lítið sem ekkert gerðist á fyrstu mínútunum.

Hættulegasta færið átti Oddur Ingi Guðmundsson þegar hann slapp í gegn eftir langa sendingu og skalla frá Fylkismönnum. Guðjón Orri Sigurjónsson varði vel með andlitinu og Eyjamenn stálheppnir að lenda ekki undir.

Jose Enrique sýndi snilli sína rétt undir lok fyrri hálfleiks þegar hann átti frábæra móttöku og skot sem endaði í slánni. Hann náði ekki mikið að sýna fyrir utan þetta í leiknum en varnarmenn Fylkis héldu honum í skefjum.

Eftir fimmtán mínútna leik í síðari hálfleik fengu Fylkismenn aukaspyrnu úti við hornfána eftir klaufalegt brot Jonathan Barden. Jóhannes Karl sendi þá háloftabolta inn á teiginn sem Guðjón Orri Sigurjónsson missti inn. Klaufalegt hjá Guðjóni sem vissi strax upp á sig sökina.

Ekkert markvert gerðist eftir markið en Fylkismenn gerðu allt sem þeir gátu til þess að láta tímann líða. Þeir nýttu tækifærin sín og gáfu fá sem engin færi á sér.

Leikplan Hermanns Hreiðarssonar virðist því hafa gengið fullkomlega upp þar sem stóru leikmenn Eyjamanna náðu engan veginn að setja mark sitt á leikinn.

Fylkismenn eru því í 6. sætinu rétt á eftir Fjölnismönnum sem unnu frækinn sigur á KR-ingum í kvöld á meðan ÍBV er í fallsæti eftir nauman sigur Leiknismanna á Íslandsmeisturum Stjörnunnar.

Hermann: Unnum baráttuna í dag„Að sjálfsögðu er ég ánægður, þetta var mjög öflugur sigur og góð þrjú stig,“ sagði Hermann Hreiðarsson, þjálfari Fylkis, eftir sigur á sínu gamla félagi á Heimaey.

„Við komum til að ná í þessi þrjú stig sem voru í boði, svekktir eftir síðasta leik. Það var gott að ná sér í það og geta gleymt þeim leik núna,“ en Fylkismenn töpuðu 4-0 gegn Fjölnismönnum í Árbænum í síðustu umferð.

„Við byrjuðum af krafti og menn fengu trúna, við unnum baráttuna í dag. Ef þú vinnur ekki baráttuna í Eyjum þá áttu ekki séns. Við vorum í heildina betra liðið og áttum þennan sigur fyllilega skilinn.“

Markið sem gestirnir skoruðu var af skrautlegri gerðinni en Guðjón Orri missti boltann inn eftir fyrirgjöf Jóhannesar Karls Guðjónssonar.

„Það var eitthvað að fara að detta á endanum, eins og ég segi vorum við búnir að setja á þá pressu í fyrri hálfleik. Það er engin spurning að við vorum grimmari á annan bolta og unnum iðnaðarsigur Það tekur sinn tíma að ná einhverju fram en þessi sigur var skref í rétta átt.“

Hermann segist vera ánægður með hópinn sem hann er með í höndunum.

„Við erum eina liðið sem fór úr plús í þessum glugga. Þetta eru strákar sem eru búnir að spila marga leiki og það eru margir Fylkismenn þarna. Þeir fá tíma til að sanna sig fyrir næsta tímabil.“

Hermann hefur hirt sjö stig úr fyrstu fjórum leikjunum við stjörnvölinn en hann segist vera sáttur með þá uppskeru.

„Já, þetta hafa verið þrír erfiðir útivellir, Hásteinsvöllur, Kaplakriki og Kópavogur. Þar eru sjö stig í þessum þremur, maður verður að vera raunsær og ég er mjög ánægður með það.“

Ásmundur: Gáfum þeim markið„Nei, ég er brjálaður,“ voru fyrstu orð Ásmundar Arnarssonar, þjálfara Eyjamanna og fyrrum þjálfara Fylkis þegar við spurðum hann út í það hvort hann væri ánægður með sína menn eftir tapið í kvöld.

Ásmundur sagði að honum fyndist liðið eiga skilið að minnsta kosti stig úr leiknum.

„Við gáfum þeim markið, það var það sem tapaði leiknum. Menn lögðu fullt í þetta í dag, það var mikil barátta í mannskapnum og miklu meiri liðsheild og samvinna en í síðustu leikjum. Það er grátlegt að fá ekkert út úr því.“

„Hann veit það sjálfur, í fyrsta lagi gefum við þeim mjög ódýra aukaspyrnu sem var algjör óþarfi. Markið var ódýrt,“ sagði Ásmundur um Guðjón Orra Sigurjónsson sem missti fyrirgjöf í sitt eigið net í síðari hálfleik.

Dómari leiksins, Ívar Orri Kristjánsson hélt áfram martröð sinni í Vestmannaeyjum. Hann dæmdi leik ÍBV og Víkings hér fyrr í sumar þar sem hann átti afleitan leik, Ívar var slæmur fyrir bæði lið þar og var ekki mikið skárri í dag. Hann hafði engin tök á leiknum og virtist veita spjöldin nokkuð handahófskennt.

„Mér fannst hann ekki höndla leikinn, ekki ná stjórn á honum,“ sagði Ásmundur um Ívar.

Ásmundur hefur nú stýrt liðinu í þremur leikjum, gegn Íslandsmeisturum Stjörnunnar, KR-ingum og nú loks Fylkismönnum. Uppskeran hefur verið slæm en liðið hefur einungis skorað eitt mark en fengið á sig átta.

„Ég er alls ekki ánægður með þessa leiki, fyrstu tveir leikirnir eru mjög daprir. Við sýndum smá karakter í dag og baráttuvilja, ef við náum að bæta ofan á það, fara stigin að koma í hús.“

Aron Bjarnason og Víðir Þorvarðarson voru settir í bekkinn í dag, hvers vegna gerði Ásmundur það?

„Við erum að leita að blöndu sem að nær að klóra inn einhver stig.“