Young áfram hjá Man Utd til ársins 2018

Ashley Young hefur skrifað undir nýjan þriggja ára samning við Manchester United.

Young, sem er þrítugur, spilaði mjög vel fyrir United á síðasta tímabili eftir erfið ár þar á undan.

Young, sem er uppalinn hjá Watford, kom til United frá Aston Villa fyrir tímabilið 2011-12 og hefur síðan þá leikið 115 leiki fyrir félagið og skorað 13 mörk. Hann varð Englandsmeistari með United 2013.

„Við erum ánægð með að Ashley hafi skrifað undir nýjan samning,“ sagði Louis van Gaal, knattspyrnustjóri United, í viðtali á heimasíðu félagsins.

„Hann er alhliða leikmaður. Hann leysti stöðu vængbakvarðar með sóma og spilaði einnig vel á kantinum á síðasta tímabili.“

United tekur á móti Tottenham í 1. umferð ensku úrvalsdeildarinnar á morgun.

Leikurinn hefst klukkan 11:45 og verður sýndur í beinni útsendingu á Stöð 2 Sport 2.

#mufc is pleased to announce @Youngy18 has signed a new contract until 2018 with the option for a further year. pic.twitter.com/KwNEh0dCje

— Manchester United (@ManUtd) August 7, 2015