Schweinsteiger: Depay er ótrúlega hæfileikaríkur

Bastian Schweinsteiger, miðjumaður Manchester United og þýska landsliðsins, var ánægður með nýju liðsfélagana sína eftir að hafa leikið fyrsta leik sinn í treyju Rauðu djöflanna.

Schweinsteiger sem gekk til liðs við Manchester United á dögunum lék sinn fyrsta leik á ferlinum í annarri treyju en treyju Bayern Munchen og þýska landsliðsins er hann kom inná í æfingarleik gegn Club America.

Ásamt Schweinsteiger léku Morgan Schneiderlin, Matteo Darmian og Memphis Depay fyrstu leiki sína fyrir félagið en Schneiderlin skoraði sigurmark Manchester United í leiknum.

„Það er gaman að sjá hversu margir efnilegir leikmenn eru hjá félaginu en Memphis stendur upp úr sem sá efnilegasti. Hann er ótrúlega hæfileikaríkur leikmaður og ég er viss um að við munum skemmta okkur vel saman inn á vellinum í vetur. Þá verður gaman að spila með Morgan, hann er góður leikmaður með gott hugarfar og hann gerði mjög vel í markinu.“