Lovren ósáttur: Ósanngjörn gagnrýni á síðasta tímabili

Dejan Lovren, króatíski miðvörður Liverpool, segir að hann eigi ekki skilið alla þá gagnrýni sem hann hefur fengið fyrir spilamennsku sína á síðasta tímabili. Lovren varð dýrasti miðvörður í sögu félagsins er Liverpool gekk frá kaupunum á honum frá Southampton síðastliðið sumar.

Lovren sem lék nánast óaðfinnanlega með Southampton á fyrsta tímabili sínu í ensku úrvalsdeildinni sem leiddi til þess að Liverpool greiddi 20 milljónir punda fyrir hann og voru miklar væntingar gerðar til hans.

Óhætt er að segja að hann hafi ekki staðið undir þeim og kórónaði hann slakt tímabil með því að skjóta Liverpool úr keppni í Evrópudeildinni gegn Besiktas með því að brenna af fimmta vítinu.

Lovren viðurkenndi að hann hefði verið slakur á síðasta tímabili en vill meina að hann sé ekki einn ábyrgur á varnarleik Liverpool sem var á köflum vandræðalegur á síðasta tímabili.

„Þetta var erfitt ár fyrir alla hjá félaginu, hvort sem um ræður stuðningsmenn eða leikmenn en þegar við erum slakir þá á það við allt liðið en ekki bara mig. Það þarf að skoða þetta betur, að mínu mati var það ósanngjarnt hjá breskum miðlum að benda bara á mig sem vandamálið. Við þurfum að gera betur sem lið á þessu tímabili því ég nenni ekki að hlusta á þetta allt á ný.“