Benteke genginn til liðs við Liverpool | Næst­dýr­ast­ur í sögu félagsins

Liverpool staðfesti rétt í þessu að búið væri að ganga frá kaupunum á belgíska landsliðsframherjanum Christian Benteke frá Aston Villa. Liverpool greiðir Aston Villa 32,5 milljónir punda en hluti greiðslunnar er árangurstengdur.

Benteke sem verður 25 ára í desember gekk til liðs við Aston Villa frá Genk árið 2012 og sló hann í gegn hjá Aston Villa. Lék hann alls lék 88 leiki fyrir félagið í ensku úrvalsdeildinni og skoraði í þeim 42 mörk, þar af fimm mörk í sex leikjum gegn Liverpool.

Er upphæðin sem Liverpool greiddi fyrir hann næst hæsta fjárhæð sem félagið hefur greitt fyrir leikmann á eftir Andy Carroll.

Benteke er sjöundi leikmaðurinn sem Brendan Rodgers, knattspyrnustjóri Liverpool fær til liðs við sig en félagið hefur þegar gengið frá kaupunum á James Milner, Danny Ings, Joe Gomez, Robert Firminho, Nathaniel Clyne og Ádám Bogdán.

Hjá Liverpool hittir Benteke fyrir liðsfélaga sína úr belgíska landsliðinu þá Simon Mignolet og Divock Origi.