Chelsea tapaði óvænt gegn New York Red Bulls | Sjáðu mörkin

Englandsmeistararnir í Chelsea töpuðu í kvöld nokkuð óvænt fyrsta leik undirbúningstímabilsins 2-4 gegn New York Red Bulls. Fyrrum leikmaður Fjölnis, Christopher Tsonis, var í byrjunarliði New York Red Bulls, og lék í 45 mínútur í leiknum.

Franski framherjinn Loic Remy skoraði fyrsta mark leiksins um miðbik fyrri hálfleiks eftir góðan undirbúning frá Oscar en heimamenn í NY Red Bulls náðu að snúa taflinu við í seinni hálfleik.

Franklin Castellanos jafnaði metinn er hann lék á Asmir Begovic, nýjasta leikmann Chelsea í upphafi seinni hálfleiks en leikmenn NY Red Bulls gerðu út um leikinn á sjö mínútna kafla um miðbik hálfleiksins.

Tyler Adams bætti við öðru marki NY Red Bulls með skalla og þremur mínútum síðar var Sean Davis á skotskónum og kom heimamönnum í 3-1. Belgíski kantmaðurinn Eden Hazard minnkaði muninn einni mínútu síðar en Davis var aftur á ferðinni stuttu síðar og gerði út um leikinn með fjórða marki NY Red Bulls.

christopher Tsonis sem skoraði fjögur mörk er hann var á mála hjá Fjölni á síðasta tímabili fékk að kljást við Gary Cahill og Kourt Zouma í fyrri hálfleik en honum var kippt af velli í hálfleik.

chelsea mætir PSG á laugardaginn en New York Red Bulls leikur degi seinna gegn Benfica og verða báðir leikirnir í beinni útsendingu á Stöð 2 Sport og Stöð 2 Sport HD.