Engin þolinmæði hjá Manchester United

Arsene Wenger, knattspyrnustjóri Arsenal, segir að innkaupastefna Manchester United gefi til kynna að félagið sé búið að gefast upp á að ala upp eigin leikmenn og að knattspyrnustjóri liðsins, Louis Van Gaal sé ekki nægilega þolinmóður.

Arsenal gekk frá kaupunum á tékkneska markverðinum Petr Cech frá Chelsea en á sama tíma hefur Manchester United gengið frá kaupunum á Memphis Depay, Bastian Schweinsteiger, Matteo Darmini og Morgan Schneiderlin.

„Við vonumst til að halda áfram að blanda þessu saman, fá til liðs við okkur góða leikmenn í bland við að gefa ungum leikmönnum sem skilja gildi klúbbsins tækifæri. Stefna okkar er ekki að kaupa alltaf til okkar tilbúna leikmenn þótt við gerum það af og til. Flest félög sem hafa náð árangri undanfarin ár gera þetta vel, fá til sín góða leikmenn til að leika með sínum eigin leikmönnum,“ sagði Wenger sem efast um að Manchester United hafi þolinmæðina til að gefa leikmönnum tækifæri líkt og þegar 92 kynslóðin steig sín fyrstu skref með Manchester United.

„Það er engin þolinmæði hjá Manchester United, möguleikinn er til staðar að kaupa einfaldlega tilbúna leikmenn. Velgengi þeirra gerir það að verkum að þeir geta keypt til sín bestu leikmenn hvers tíma.“