Sextíu fjöldagrafir fundust við leit að nemunum

Fundist hafa sextíu fjöldagrafir í suðurhluta Mexíkó frá því að leit hófst að fjörutíu og þremur kennaranemum í september. Í þeim fundust jarðneskar leifar 129 einstaklinga, að því er segir í opinberum gögnum stjórnvalda sem birt voru í gær.

Talið er líklegt að grafirnar séu enn fleiri. Hvorki tangur né tetur hefur fundist af nemendunum sem hurfu sporlaust í september á síðasta ári. Yfirvöld telja að lögreglan í Guerrero hafi rænt nemunum og afhent eiturlyfjasölum sem hafi myrt þá og brennt.  Spilling er sögð einkenna lögregluna og hafa tugir verið handtekinir vegna málsins.