Glen Johnson til Stoke á frjálsri sölu

Glen Johnson hefur skrifað undir tveggja ára samning við enska úrvalsdeildarliðið Stoke City með möguleika á einu ári til viðbótar.

Johnson kemur frá Liverpool en samningur hans við Bítlaborgarliðið rann út fyrr í sumar.

„Hann er frábær viðbót við hópinn. Hann er hæfileikaríkur varnarmaður sem getur skilað mörkum,“ sagði Mark Hughes, knattspyrnustjóri Stoke, um nýja leikmanninn.

Johnson er sjötti leikmaðurinn sem Hughes fær til Stoke í sumar á eftir Marco van Ginkel, Shay Given, Joselu, Philipp Wollscheid og Jakob Haugaard.

Johnson, sem er þrítugur, lék í sex ár með Liverpool og vann deildarbikarinn með liðinu 2012.

Johnson lék áður með Portsmouth, Chelsea, Millwall og West Ham en hann er uppalinn hjá síðastnefnda liðinu.