Maradona um Messi: Ertu argentínskur eða sænskur?

Knattspyrnugoðsögnin Diego Maradona segir að það sé auðvelt að svekkja sig á frammistöðu Lionel Messi með argentínska landsliðinu.

Argentína komst í úrslitaleik Suður-Ameríkukeppninnar á dögunum en tapaði fyrir Síle í úrslitaleiknum, ári eftir að hafa tapað fyrir Þýskalandi í úrslitaleik HM í Brasilíu.

Messi hefur einu sinni sem oftar verið gagnrýndur fyrir frammistöðu sína í landsliðsbúningnum og Maradona segir að það sé eðlilegt.

„Við eigum besta leikmann heims. Hann skorar fjögur mörk gegn Real Sociedad og svo kemur hann hingað og kemur ekki við boltann. Maður spyr sig hvort hann sé argentínskur eða sænskur,“ sagði hann í viðtali í heimalandinu.

„Fólk verður samt að hætta að tala um að Messi þurfi að fá einhverja sérmeðferð í landsliðinu. Það á að koma fram við Messi eins og hvern annan leikmann í liðinu.“

„Það er ekki eins og að Messi hafi myrt eða nauðgað einhverjum. Það má ekki gera of mikið mál úr þessu,“ sagði Maradona og sagðist gagnrýna Messi með þeirri von að hann myndi bæta frammistöðu sína með landsliðinu.

„Við verðum samt að halda ró okkar. Við megum ekki gerast öfgamenn út af þessu máli en heldur ekki sætta okkur endalaust við annað sætið.“