Origi skoraði í fyrsta leiknum í Liverpool-treyjunni

Liverpool keypti Divock Origi frá franska liðinu Lille fyrir ári síðan en þessi tvítugi Belgi spilaði ekki fyrsta leikinn með félaginu fyrr en í dag.

Divock Origi átti ekki gott tímabil með Lille í frönsku deildinni eftir að hafa slegið í gegn á HM í Brasilíu en mark í fyrsta leik með Liverpool gæti kannski verið upphafið að betri tíð fyrir framherjann.

Liverpool vann 4-0 sigur á tælensku úrvalsliði í í dag í fyrsta leik sínum í æfingaferðinni til suðaustur Asíu en spilað var í miklum hita í Bangkok. Lazar Markovic, Mamadou Sakho, Adam Lallana og Origi skoruðu mörk liðsins í leiknum en staðan var 2-0 í hálfleik.

Joao Teixeira, sem er að koma til baka eftir ökklabrot í febrúar þegar hann var á láni hjá Brighton, stóð sig mjög vel og lagði upp tvö fyrstu mörk Liverpool í leiknum.

Markvörðurinn Adam Bogdan, varnarmaðurinn Joe Gomez og framherjinn Danny Ings voru allir í byrjunarliðinu og spiluðu sinn fyrsta leik fyrir félagið. Ings var nálægt því að skora en markið hans var dæmt af fyrir brot.

Nýju mennirnir, Nathaniel Clyne, James Milner og Origi, komu allir inná í hálfleik en Roberto Firmino er ekki með liðinu þar sem að hann fékk aukafrí eftir Suður-Ameríkukeppnina með brasilíska landsliðinu.

Divock Origi skoraði markið sitt með skalla eftir hornspyrnu fyrirliðans Jordan Henderson. Áður hafði hann skotið boltanum tvisvar í stöngina og einnig átt skot rétt yfir markið. Origi var mjög líflegur en nýtti færin sín ekki vel.

Liðið sem spilaði fyrri hálfleikinn: Bogdan, Gomez, Toure, Sakho, Wisdom, Lucas, Rossiter, Teixeira, Markovic, Ings og Lambert.

Liðið sem spilaði seinni hálfleikinn: Mignolet, Clyne, Skrtel, Lovren, Maguire, Allen, Henderson, Milner, Ibe, Lallana og Origi.