Gerrard úr leik í bikarnum

Steven Gerrard kom inn á sem varamaður fyrir LA Galaxy sem tapaði fyrir Real Salt Lake í 8-liða úrslitum bikarkeppninnar í Bandaríkjunum í nótt, 1-0.

Gerrard kom inn á í hálfleik og fékk gott tækifæri til að koma sínum mönnum yfir þegar stundarfjórðungur var eftir af leiknum og staðan markalaus. Hann fékk sendingu frá Robbie Keane en skot hans fór yfir.

Aaron Maund tryggði svo Real Salt Lake sigurinn en eftir leik viðurkenndi Gerrard að vonbrigðin væru mikil. „Það er alltaf slæmt að tapa, sérsatklega á marki undir lok leiksins,“ sagði hann.

„Við fengum tækifæri til að koma leiknum í framlengingu. Ég klúðraði mínu færi og tek ábyrgð á því. En stóri leikurinn í þessari viku er á föstudag og við ætlum okkur að komast á sigurbraut þá.“

Gerrard mun líklega spila sinn fyrsta leik í MLS-deildinni á föstudag er Galaxy mætir San Jose Earthquakes.