Rúmlega helmingur unglinga vill flytja af landi brott

Rúmlega helmingur íslenskra ungmenna vill helst búa í útlöndunum í framtíðinni ef marka má nýja rannsókn Háskólans á Akureyri. Það eru um 70 prósent aukning frá árinu 2007 þegar um þriðjungur ungmenna sagðist vilja flytja af landi brott.

Akureyri Vikublað greinir frá rannsókninni en hún er hluti evrópsku ESPAD rannsóknarinnar og nær til allra íslenskra unglinga í 10. bekk grunnskóla. Hátt í fjögur þúsund íslenskir unglingar tóku þátt í ár en rannsóknin er lögð fyrir á fjögurra ára fresti og svarhlutfallið alla jafna gott, um 85-92%.

Fyrir hrun árin, 2003 og 2007, vildi um þriðjungur íslenskra unglinga helst búa erlendis en réttur helmingur þeirra árið 2015. Þessi hlutföll eru lítið eitt hærri á höfuðborgarsvæðinu en utan þess.

Haft er eftir yfirmanni rannsóknarinnar, Þóroddi Bjarnasyni prófessor á vefsíðu Vikublaðsins, að mikilvægt sé að taka þessa viðhorfsbreytingu alvarlega. Hann telur þó ekki sérstaka ástæðu til að óttast aðdráttarafl annarra landa.

„Það er hins vegar okkar sem eldri erum að skapa hér samfélag sem gott er að flytja til, hvort fólk á hér rætur eða ekki. Í þessari alþjóðlegu samkeppni er fjölbreytni búsetukosta í stærri og smærri byggðarlögum lykilatriði þannig að sem flestir vilji snúa heim aftur með nýja þekkingu og reynslu, og ekki síður til að fólk með rætur í öðrum byggðarlögum eða öðrum löndum geti fundið hér framtíðarheimili, hvort sem það kemur hingað á eigin vegum eða til dæmis með maka á heimleið,“ segir Þóroddur í samtali við Akureyri Vikublað.

Þá leiðir rannsókn Háskólans einnig í ljós að sífellt færri ungmenni sjá höfuðborgarsvæðið sem framtíðarheimili sitt. Það stafar einn helst af minnkandi áhuga unglinga höfuðborgarsvæðisins á því að búa þar áfram í framtíðinni, lækkaði úr 53 prósent árið 2003 í 36 prósent árið 2015.  

Þá lækkar einnig áhugi landsbyggðarunglinga á því að búa áfram á landsbyggðinni á milli kannanna, úr 55 prósent árið 2003 í 39 prósent árið 2015.

Þóroddur telur þessar niðurstöður vera til marks um aukna alþjóðlega strauma um land allt. „Stundum hefur því verið haldið fram að fólksflutningar innanlands séu einkum milli Reykjavíkur og landsbyggðanna en flutningar milli landa séu milli Reykjavíkur og annarra landa. Myndin er þó talsvert flóknari og hefur breyst talsvert á síðustu árum,” segir Þóroddur en betur má glöggva sig á niðurstöðum hans hér.