Valdes á útleið: Svaraði Van Gaal á Twitter

Markvörðurinn Victor Valdes verður seldur frá Manchester United ef marka má orð knattspyrnustjórans Louis van Gaal.

Valdes mun hafa neitað að spila með varaliði félagsins á síðustu leiktíð en markvörðurinn var ekki í hópi United sem fór í æfingaferðina til Bandaríkjanna.

„Hann neitaði að spila með varaliðinu á síðasta tímabili og markverðir United þurfa að vera með öðruvísi viðhorf en það,“ sagði Van Gaal.

„Það eru mikil vonbrigði. Það er mikil synd því hjá okkur fékk hann tækifæri til að ná heilsu á ný, við gáfum honum samning og svo var hann leikfær,“ sagði Hollendingurinn en Valdes var að ná sér af erfiðum hnémeiðslum þegar hann kom til United.

Valdes hefur nú svarað fyrir sig á Twitter-síðu sinni eins og sjá má hér fyrir neðan. Þar birtir hann myndum af U-21 leikjum United sem hann hefur tekið þátt í og skrifar einfaldlega: „...? #virðing“.

Samningur hans við liðið rennur út á næsta ári en líklegt er að hann verði nú seldur frá Manchester United. David De Gea, aðalmarkvörður liðsins, á einnig eitt ár eftir af samningi sínum en hann hefur verið orðaður við Real Madrid.

Van Gaal segir að það komi ekki til greina að selja De Gea.

.....? #respect pic.twitter.com/LSnwz1HfDB

— Victor Valdes (@1victorvaldes) July 16, 2015