Neitar sök og kennir meintu fórnarlambi um

Richard Barklie, einn stuðningsmanna Chelsea sem er fyrir rétti vegna atviks sem átti sér stað í tengslum við leik liðsins gegn PSG í Meistaradeild Evrópu á síðustu leiktíð, viðurkennir að hann hafi ýtt við þeldökkum manni sem var að reyna að komast inn í neðanjarðarlest í París í febrúar.

Engu að síður fullyrðir hann að maðurinn, Souleymane Sylla, hafi verið upphafsmaður að átökunum og neitar sjálfur sök. Sylla hafi reynt að troða sér inn í fulla lest.

„Að mínu mati var Hr. Sylla sá eini á staðnum sem sýndi ofsafengna hegðun,“ sagði Barklie sem er fyrrum lögreglumaður. Á myndbandsupptökum mátti heyra stuðningsmenn syngja að þeir væru kynþáttahatarar og það væri þeim að skapi [e. We're racist and that's the way we like it].

Barklie þvertekur fyrir að húðlitur Sylla kæmi málinu nokkuð við. Þrír aðrir neita sök í málinu og sætta sig ekki við að bann sem þeir hafa verið settir í.

Einum þeirra, Jordan Munday, er gefið að sök að hafa sungið með stuðningsmönnum Chelsea þó svo að munnhreyfingar hans í myndbandinu gefi annað í skyn. „Ég var að anda. Ég verð að anda,“ sagði hann fyrir dómi en málið verður áfram til umfjöllunar á næstu dögum.