Van Gaal: Old Trafford er ekki notaður undir tónleika með One Direction

Louis van Gaal, knattspyrnustjóri Manchester United, hefur áhyggjur af slæmu ástandi vallanna sem liðið leikur á í Bandaríkjatúr sínum.

United vann 1-0 sigur á Club America í nótt á frekar slæmum velli í Seattle en aðeins tveir dagar eru síðan hann var notaður undir tónleika hljómsveitarinnar vinsælu One Direction.

„Völlurinn var ekki góður,“ sagði Hollendingurinn eftir leikinn í nótt.

„Það var búið að leggja gras yfir gervigrasið á vellinum og það var alltaf að færast til. Svona er þetta í Bandaríkjunum. Vellirnir eru notaðir undir fleira en fótbolta.

„Old Trafford er eingöngu notaður undir fótbolta, ekki One Direction tónleika.

„Annars eru allar aðstæður frábærar og gætu ekki verið betri.“

Morgan Schneiderlin skoraði sigurmark United gegn Club America, í sínum fyrsta leik fyrir félagið en auk hans þreyttu Memphis Depay, Matteo Darmian og Bastian Schweinsteiger frumraun sína með United í nótt.