Fyrrum framherji landsliðsins hrósar Aroni

Gamla kempan Brian McBride hrósar Aroni Jóhannsyni fyrir frammistöðu sína með bandaríska landsliðinu í fótbolta í Gullbikarnum, álfukeppni Norður- og Mið-Ameríku. Aron átti stórleik í gær þegar lið hans burstaði Kúbu 6-0 í 8-liða úrslitunum.

„Hann er með frábær hlaup og er útsjónarsamur. Það er frábært að hann sé kominn á fullt með liðinu,“ segir McBride sem á árum áður lék 95 leiki fyrir bandaríska liðið og skoraði í þeim þrjátíu mörk. „Hann er mmjög góður í að hlaupa á eftir stungusendingum og gerir það betur en að fá hann í fætur og halda honum.“

Aron skoraði glæsilegt mark í leiknum í gær auk þess að leggja uppp annað og fiska vítaspyrnu. Clint Dempsey fór mikinn í gær og skoraði þrennu en eitt markanna kom úr vítaspyrnu sem Aron fiskaði. Aron segir að hann geti lært mikið af Dempsey.

„Hann er mjög, mjög góður sóknarmaður eins og hann hefur sýnt á mótinu. Þrátt fyrir aldurinn er hann að koma sér á rétta staði í teignum í sífellu. Ég reyni að fylgjast með honum eins og ég get og læra af honum.“

Bandaríkin mæta Jamaíku í undanúrslitum mótsins á miðvikudag.