Aron með stórleik í 6-0 sigri Bandaríkjanna á Kúbu | Myndband

Aron Jóhannsson átti stórleik þegar Bandaríkin burstuðu Kúbu, 6-0, í 8-liða úrslitum Gullbikarsins, álfukeppni Norður- og Mið-Ameríku.

Aron skoraði þriðja mark Bandaríkjanna á 32. mínútu þegar hann lyfti boltanum laglega yfir markvörð Kúbu. Þetta var fjórða mark Arons fyrir bandaríska landsliðið en það má sjá hér að neðan.

Clint Dempsey, sem lék í framlínu Bandaríkjanna með Aroni, gerði þrennu en annað mark hans kom úr vítaspyrnu sem Aron fiskaði.

Aron lagði einnig upp fjórða mark bandaríska liðsins fyrir Omar González. Gyasi Zardes komst einnig á blað.

Bandaríkin mæta annað hvort Jamaíku eða Haítí í undanúrslitunum á miðvikudaginn.