Van Persie: Van Gaal gaf mér ekki séns

Þriggja ára dvöl Robin van Persie hjá Manchester United lauk í vikunni sem leið en þá skrifaði Hollendingurinn undir hjá Fenerbache í Tyrklandi. Hann segir eina ástæðu þess að hann fór frá liðinu vera þá að Louis van Gaal hafi ekki gefið honum séns.

„Ég bað um að fá að spila með varaliðinu til að fá mínútur en í kjölfarið fann ég mig á bekknum,“ segir van Persie í samtali við Sunday Times. „Ég ætlaði að koma til baka eftir sumarfríið og berjast fyrir sæti mínu en það var ekki í boði.“

Hollendingurinn kom til Manchester frá Arsenal fyrir tímabilið 2012-13. Hann skoraði 58 mörk í 105 leikjum fyrir liðið en áður hafði hann skorað 132 mörk í 277 leikjum á átta tímabilum með Arsenal. Van Persie ræðir einnig um Arsene Wenger, fyrrum þjálfara sinn, í viðtalinu.

„Sumir halda að ég hafi farið frá Arsenal í illu en það er ekki raunin. Við Arsene tölum reglulega saman og virðum hvorn annan. Ég skil að margir séu fúlir enda var ég fyrirliði liðsins. Mig langaði að vinna ensku deildina og taldi möguleikana betri til þess hjá United.“