Cabaye væntanlega til Crystal Palace fyrir metfé

Enska úrvalsdeildarliðið Crystal Palace hefur komist að samkomulagi við Frakklandsmeistara Paris Saint-Germain um kaup á miðjumanninum Yohan Cabaye.

Kaupverðið verður í kringum 10 milljónir punda en sú upphæð gæti hækkað. Búist er við því að Cabaye gangist undir læknisskoðun hjá Palace á næstu tveimur sólarhringum.

Cabaye, sem er 29 ára, þekkir vel til Alans Pardew, knattspyrnustjóra Palace en hann hann fékk Frakkann til Newcastle United frá Lille árið 2011. Cabaye lék 93 leiki fyrir Newcastle og skoraði í þeim 18 mörk.

Cabaye var seldur til PSG í janúar 2014 en hefur gengið illa að vinna sér sæti í byrjunarliði franska stórliðsins sem vann alla þrjá titlana sem í boði voru í Frakklandi á síðasta tímabili.

Gangi kaupin í gegn verður Cabaye dýrasti leikmaður í sögu Palace sem endaði í 10. sæti úrvalsdeildarinnar í vetur.