Welbeck meiddur og fer ekki með til Singapúr

Danny Welbeck fer ekki með Arsenal til Singapúr í næstu viku þar sem Skytturnar munu taka þátt í æfingamóti.

Welbeck er meiddur á hné en hann missti af sex síðustu leikjum Arsenal á síðasta tímabili vegna þessara meiðsla. Framherjinn missti m.a. af úrslitaleik ensku bikarkeppninnar þar sem Arsenal vann öruggan 4-0 sigur á Aston Villa.

Welbeck hefur verið mun lengur frá en áætlað var í fyrstu og hann missir því af stórum hluta undirbúningstímabilsins.

Tomas Rosicky fer heldur ekki með til Singapúr vegna meiðsla sem hann varð fyrir í landsleik Tékklands og Íslands á Laugardalsvelli, 12. júní síðastliðinn.

Carl Jenkinson, Serge Knabry, Joel Campbell og Yaya Sanogo verða sömuleiðis eftir heima en gert er ráð fyrir því að þeir verði annað hvort seldir eða lánaðir frá félaginu á næstunni.

Þá fá Alexis Sánchez og David Ospina lengra frí vegna þátttöku sinnar í Suður-Ameríkukeppninnii.