Söguleg mörk í sigri Brasilíu | Myndband

Fyrstu umferð riðlakeppninnar á HM í fótbolta í Kanada lauk í gær þegar Brasilía vann 2-0 sigur á Suður-Kóreu í Montreal.

Mörkin úr leiknum má sjá hér að neðan.

Hin 37 ára gamla Formiga kom Brasilíu yfir á 33. mínútu og Marta gulltryggði svo sigurinn með marki úr vítaspyrnu eftir sjö mínútna leik í seinni hálfleik.

Bæði mörkin voru söguleg. Formiga, sem er að spila á sínum sjötta heimsmeistaramóti, varð elsti leikmaðurinn til að skora mark í sögu HM og mark Mörtu þýðir að hún er orðin markahæst í sögu keppninnar.

Þessi magnaða fótboltakona, sem er samherji Söru Bjarkar Gunnarsdóttur hjá Rosengård í Svíþjóð, hefur nú gert 15 mörk á HM, einu meira en hin þýska Birgit Prinz gerði á sínum tíma.

Brasilía er með þrjú stig í E-riðli, Kosta Ríka og Spánn sitt stigið hvort en Suður-Kórea er stigalaus.