Rapione gerði útslagið í sigri Bandaríkjanna | Myndbönd

Bandaríkin báru sigurorð af Ástralíu í fyrsta leik sínum á HM í Kanada í gær.

Þær bandarísku þurftu að hafa mikið fyrir sigrinum en tvö falleg mörk frá Megan Rapinoe gerðu útslagið.

Rapinoe kom Bandaríkjunum, sem hafa ekki unnið HM frá árinu 1999, yfir á 12. mínútu en Lisa De Kanna jafnaði metin á 27. mínútu.

Staðan var 1-1 í hálfleik og fram á 61. mínútu þegar Christen Press kom þeim bandarísku aftur yfir. Það var svo Rapinoe sem gulltryggði sigurinn með öðru marki sínu á 78. mínútu.

Bandaríkin eru með þrjú stig í D-riðli, Nígería og Svíþjóð sitt hvort stigið en Ástralía er án stiga.

Aya Miyama tryggði heimsmeisturum Japans öll þrjú stigin gegn Sviss í Vancouver en hún skoraði eina mark leiksins úr vítaspyrnu á 29. mínútu.

Japan er með þrjú stig í C-riðli, líkt og Kamerún sem valtaði yfir Ekvador með sex mörkum gegn engu í gær. Þetta var fyrsti leikur Kamerún á HM frá upphafi og það er óhætt að þær hafi byrjað með látum.

Gaelle Enganamouit skoraði þrennu fyrir Kamerún og þær Madeleine Ngono Mani, Christine Manie og Gabrielle Onguene sitt markið hver en þrjú marka Kamerún komu úr vítaspyrnum.

Mörkin og helstu atvik úr leikjunum þremur má sjá hér að neðan.