Myndir þú vilja keyra aftan á Roy Keane?

Alex Pearce, leikmaður Reading og írska landsliðsins, fékk einkennilega spurningu þegar hann ræddi við blaðamenn eftir landsliðsæfingu í dag.

Í gær bárust fregnir af því að þjálfarateymi írska landsliðsins lenti í umferðaróhappi þegar ekið var aftan á þá. Í þeim hópi var aðstoðarþjálfarinn Roy Keane.

Keane er ekki allra og afar umdeildur maður. Pearce var spurður út í atvikið og sagði að sem betur fer væru allir heilir á húfi og að leikmenn og þjálfarar hefðu getað grínast með þetta eftir á.

„En myndir þú vilja keyra aftan á Roy Keane?“ var þá spurning sem Pearce fékk. Hann svaraði henni vitanlega ekki og vísaði henni aftur til umrædds blaðamanns, eins og sjá má í meðfylgjandi myndbandi.