Sjáðu ótrúleg mistök markvarðar Jamaíku | Myndband

Það var ansi skrautlegt markið sem réði úrslitum í leik Paragvæ og Jamaíku í Suður-Ameríkukeppninni í gær.

Staðan var markalaus fram á 36. mínútu þegar Duwayne Kerr, markvörður Jamaíku, gerði sig sekan um slæm mistök.

Víctor Cáceres, miðjumaður Paragvæ, átti þá langa sendingu inn fyrir vörn Jamaíku, Kerr var við öllu búinn, kominn langt út fyrir sinn eigin vítateig og skallaði boltann frá.

En svo vildi ekki betur til en að skalli hans fór í Édgar Benítez og þaðan í markið. Ótrúlegur klaufaskapur hjá Kerr sem hefur væntanlega ekki sofið vel í nótt.

Þetta reyndist eina mark leiksins en sigurinn kom Paragvæ í góða stöðu í B-riðli.

Liðið er með fjögur stig eftir tvo leiki, jafnmörg og Argentína. Jamaíka, sem er gestaþjóð á mótinu, er hins vegar án stiga og á aðeins veika von um að komast áfram í 8-liða úrslitin.

Markið klaufalega má sjá hér að neðan.