Neymar dæmdur í fjögurra leikja bann

Neymar, fyrirliði brasilíska landsliðsins, hefur verið dæmdur í fjögurra leikja bann. Auk bannsins fékk Neymar 10.000 dollara sekt.

Neymar fékk að líta rauða spjaldið eftir 1-0 tap Brasilíu fyrir Kólumbíu í Suður-Ameríkukeppninni á miðvikudaginn fyrir að sparka boltanum í Pablo Armero, bakvörð Kólumbíu. Í kjölfarið virtist hann svo skalla markaskorarann Jeison Murillo.

Neymar fékk upphaflega tveggja leikja bann sem var stytt í einn leik en bannið hefur nú verið lengt um tvo leiki. Brasilía hefur til morguns til að áfrýja banninu.

Verði áfrýjunni vísað frá mun Neymar ekki spila meira með Brasilíu á mótinu en liðið á í mesta lagi fjóra leiki eftir, að því gefnu að það fari í úrslitaleikinn.