Innlent

Leitað barna sem sjást í frægri heimildarmynd

Kristján Már Unnarsson skrifar
Nokkrir kvikmyndaáhugamenn leita nú aðstoðar almennings við að komast að því hvaða íslensk börn sjást í áratugagömlu myndskoti í franskri kvikmynd, sem nýlega var valin þriðja besta heimildarmynd sögunnar. Kvikmyndin var frumsýnd árið 1982 og heitir Sans Soleil, eða Án sólar.

Spurningarnar eru: Hvar voru þessar myndir teknar á landinu, hvaða ár voru þær teknar og síðast en ekki síst: Hvaða börn eru þetta?

Myndefninu bregður fyrir í franskri heimildamynd en í fréttum Stöðvar 2 svarar Ásgrímur Sverrisson kvikmyndaleikstjóri því hversvegna hann og nokkrir aðrir kvikmyndaáhugamenn leita þessara svara.

„Það er nú bara í fyrsta lagi vegna þess að þetta er afskaplega fræg mynd í sögunni,“ segir Ásgrímur og bendir á að breska kvikmyndatímaritið Sight and Sound hafi í fyrra valið hana þriðju bestu heimildarmynd sögunnar eftir könnun meðal 300 gagnrýnenda og kvikmyndagerðarmanna um allan heim.

Líklegt er talið að myndskeiðið hafi verið tekið á árabilinu 1963 til 1973.
Kvikmyndin er framúrstefnuleg hugleiðing franska kvikmyndaleikstjórans Chris Marker um minni og skynjun mannsins en myndefnið frá Íslandi er sagt tekið af frægum eldfjallafræðingi, Haroun Tazieff, árið 1970. Það stenst þó ekki alveg því einnig sjást myndir af gosinu í Eyjum 1973.

Tazieff þessi vakti reyndar reiði á Íslandi þegar hann spáði því að Heimaey myndi springa og eyðast. Hann myndaði einnig Surtseyjargosið og Heklugos 1970 og er talið að hann hafi tekið myndirnar af börnunum í einni af Íslandsferðum sínum á árabilinu 1963 til 1973.

„Myndin skipar það stóran sess í kvikmyndasögunni og það væri mjög gaman að vita hvaða Íslendingar eru þetta? Hvaða krakkar eru þetta?“

Ásgrímur giskar á að krakkarnir gætu í dag verið á aldrinum 55 til 60 ára.

Ábendingum má koma á framfæri á frettir@stod2.is og í athugasemdadálki fréttarinnar.




Fleiri fréttir

Sjá meira


×