Ástralir vilja ekki taka á móti bátafólki

„Nei, nei, nei,“ sagði Tony Abbott, forsætisráðherra Ástralíu, þegar hann var spurður að því hvort áströlsk yfirvöld vildu taka á móti einhverjum af þeim þúsundum flóttamanna sem sigla á bátum frá bæði Mjanmar og Bangladess.

„Við viljum ekki gera neitt sem ýtir undir að fólk fari um borð í slíka báta. Ef við gerum það mun vandamálið einungis aukast, ekki minnka,“ segir Abbott í samtali við AP.

Talið er að um sjö þúsund manns, að stórum hluta rohingja-múslímar, séu nú um borð í bátum í Suður-Asíu eftir að hafa flúið ofsóknir heima fyrir. Fjölmörg ríki í heimshlutanum hafa neitað því að taka á móti flóttafólkinu.