Verkföll hefjast strax eftir páska

Fyrstu félagsmenn BHM fara í verkfall á þriðjudaginn en næsti fundur samninganefnda ríkisins og BHM í kjaradeilu aðildarfélaga bandalagsins er ekki boðaður fyrr en á miðvikudag. Formaður BHM segir verkföllin koma til með að hafa mikl áhrif á samfélagið og gagnrýnir að ekki verði fundað í deilunni fyrr en eftir að verkföllin hefjast.

Félagsmenn samþykktu í mars að hefja verkföll strax eftir páska. Síðasti fundur í deilunni á mili samninganefndar félagsins og ríkisins var í fyrradag hjá ríkissáttasemjara. Páll Halldórsson, formaður BHM, segir að ekkert hafi miðað í kjaraviðræðunum á fundinum.

„Stað núna er alveg sú sama og hún hefur verið alla tíð. Ríkið hefur ekkert hreyft sig, þeir hafa boðið okkur þrjú og hálft prósent í kauphækkun,  en það er alveg ljóst mál að það dugar ekki. Þess vegna stöndum við núna frammi fyrir því að verkföll munu hefjast á þriðjudaginn og okkur þykir það mjög hart að menn séu ekki tilbúnir að leggjast í vinnu við að leysa úr því máli,“ segir Páll.

Páll segir ríkið sýna mikið andvaraleysi í málinu og segist undrast að ríkið sé ekki tilbúið til að setjast niður yfir páskana til að reyna að vinna lausn á deilunni áður en til verkfalla kemur en næsti fundur í  verður á miðvikudag.

„Við höfum krafist þess að menn legðust yfir þessa deilu til að finna lausnir áður en til verkfalla kemur en ríkið er ekki tilbúið til þess“.

Hann segir að verkföllin komi til með að hafa mikil áhrif þar sem störf verða lögð niður.

„Inni á Landspítalanum eru nokkrir hópar sem leggja niður störf, lífeindafræðingar, geislafræðingar, ljósmæður og náttúrufræðingar á rannsóknarstofum og síðan starfsmenn sýslumanns í Reykjavík. Þetta mun hafa veruleg áhrif, og okkur finnst nokkuð frumstætt að menn þurfi fyrst að fara í slagsmál áður en menn fara að ræða í fullri alvöru lausnir á þessu máli.“ segir Páll.