Loftárásir hafnar gegn liðsmönnum al-Shabab

Keníski herinn hefur hafið loftárásir á búðir herskáu íslamistasamtakanna al-Shabab í nágrannaríkinu Sómalíu, að því er BBC greinir frá. Búðirnar eru við landamæri Keníu og að sögn hersins hafa liðsmenn samtakanna komið sér þaðan inn í landið.

Þetta eru fyrstu viðbrögð hersins við árás al-Shabab á háskólann í borginni Garissa í síðustu viku. Þar voru 148 nemar myrtir. Þjóðarsorg hefur verið lýst yfir í Kenía og Uhuru Kenyatta, forseti landsins, hefur lofað því að mæta liðsmönnum al-Shabab af fullum þunga.

Loftárásirnar hófust í gærkvöldi en talsmenn hersins gefa upp lítið annað að svo stöddu.